پاسخ به:🌹 اشعار زیبای ترکی ... 🌹
دوشنبه 5 بهمن 1394 4:15 PMمحرم عمی آنالار حاقیندا تقدیم ائدیر
((نه نه¬م آی نه نه¬م))
دونیانین غملری سیخاندا منی
حالیما یانان ننهم آی ننهم
گیزیلینجه اوتوروب آغلایاندا من
منه همزبان ننهم آی ننهم
حسرتلر یاش اولوب گؤزدن آخاندا
آرزولار اوزاقدان منه باخاندا
قلبیمی یاندیریب بیری یاخاندا
منه مهربان ننهم آی ننهم
اورکده محبت توخومی اَکن
بالانین هر زامان قایقیسین چکن
ائولاددان خاطیره گؤز یاش تؤکن
دیلی جیسمه جان ننهم آی ننهم
آغاردی ساچلاری سارالدی اوزی
نیسگیل بولاقیدیر او آلا گؤزی
یادیمنان چیخماییر لایلالی سؤزی
بدنیمدهکی قان ننهم آی ننهم
خیالی اینجهدی دسته دستهدی
گؤزومون نورودی, گؤزوم اوستهدی
نه یامان قوجالیب جانی خستهدی
آمان آی آمان, ننهم آی ننهم
هئی چکیر فیکیرین, ائوین ائشیگین,
تربهدر یوخولو بالا بئشیگین
هر زامان اوشاقین چکر کشیگین
قوجالما دایان ننهم آی ننهم
گؤزومون قاراسی ننهم آی ننهم
اورگین پاراسی ننهم آی ننهم
آیریلیق یاراسی ننهم آی ننهم
بئلی آی کمان, ننهم آی ننهم
شعر :محرم محمدزاده (محرم عمی)