🌹 اشعار زیبای ترکی ... 🌹
⚡️كوسموشم ، بیرده باریشمام داها یالوارما منه
تك لیغین لایقیسن گت، بالا یالوارما منه⚡️
⚡️نچه ایل نازیوی چكدیم ،ولی سن ظلم ایلدون
ایندی ده ، ای داش اوره دون داشا یالوارما منه⚡️
⚡️منیم آغلار گوزمه رحم ائلیپ ، هن دمدون
ایندی گر گوز یاشون آخسا چایا، یالوارما منه⚡️
⚡️یالواریردیم سنه من ، سن چووروردون اوزوی
ایندی ده كئچمیشی سال یادیوا ، یالوارما منه⚡️
⚡️سن اوزون داشلامیسان باغدا گولون بولبولنی
گله بولمز یئنه بلبل باغا ، یالوارما منه⚡️
⚡️دئدیم گل با هم اولاخ ساده توتوپ خوش یاشییاخ
سومدین ، پس داها گت تك یاشا یالوارما منه⚡️
گله جک
بولبول آز سیزلا آزیب قیش لالالی یاز گله جک
حیات آغرینچیلاری تور ته له لی آز گله جک
تـه لـه قـورماق اولاجـاق تورچییا هر یاندا یاساق
سونالار قارشی گؤله اؤردک ایله قاز گله جک
چـن بورانلی قارا قیش گول چیچه یه دونلانیبان
آشیق آردینجا اوزان الده قوپوز ساز گله جک
زخمـه تئللرده گـزیب ســاز ایلــه دمسـاز اولالی
شمعـه پروانـه قـونـاق بولبــوله آواز گلـه جک
باغلی محفیل آچیلیب سئوگی سئوینج ایله قوشا
الـده سـاغر دولـو مئی نـازیلـه طنّـاز گله جک
بـزم دن وجــده گلیب عــرشـده حــورایله ملَک
قارشی اونلارلا سوزوب بزمه پری ناز گله جک
«ایمـان »ین دا قـزلی ایلهــام ایلـه قــارشیــلانیب
شـاختـانی آزدیریبان اؤلکه سینه یاز گله جک
❤️ ❤️ دیندیر منی❤️❤️
اوره گیم آز قالا سنسیز گؤزه لیم اودلا یانا
بو غریب خسته نی دیندیر ,گل اونو قویما یانا
عشق دردین نه بیلر ,چکمین آغولرینی
باشی سؤودالی جرک,بیر بئله سوودانی قانا
جانیخان قیبله سینی هرکسه بیر جور تانیدار
سن منیم قیبله می بنزد,او گؤزه ل قاش کامانا
کؤنده رر قیبله می هر ده ن ,یئنی بیر قاشی کمان
باتیرار غمزه سینین ,کیپریگی محرابی قانا
زاهیدین سؤیله دیگی حورو صاباح جنت ده
گتیرر بللی دی کی ,زاهیدی آخیردا جانا
آز قالا کوثر ایکون سلسبیله چاتماق ایچون
سئوگینی گؤزده ن آتیب ,تانرینی دا اوردا دانا
دوداغین شهدینی شکر ,تانیدیم سلسبیلین
چاناغیمدان آخیلان زمزمی ده حور سانا
(صاحیبا )شهد و شکر سؤزلریوین شفتی چیخیر
آری اولماق پته گه ,شفتی ویرا بیرده شانا
شعر : جواد یگانه,صاحیب,
من بو عالَمده فَلَکدَن چؤخ جَفالار گؤرمیشَم
چَکمیشَم هرنازی آمما بی وَفالار گؤرمیشَم
دَردی عِشقه موبتَلایَم،خَسته کؤنلوم چیرپینار
بیر مَحَببَت گؤرمَدیم یاردان، اَدالَار گؤرمیشَم
باشیمه هَربیراؤیون گَتدی اورَک کؤیرَکلیئیم
جانیمی یاندیردیقیمدان ماجَرالَار گؤرمیشَم
شوریدورباختیم نه تَک قاره،باخون ایقبالیمه
ظولم اِئدَن بیگانه دَن چؤخ، آشِنا لَارگؤرمیشَم
چؤخلارین اؤز دَردیمه چاره سانیردیم دَهریده
حِیف اؤلا آغزیمدا زَهراؤلمیش دَوالَار گؤرمیشَم
دُوشمان اِئیلَر اؤلسادا هَرکیمسِئیه هَربیر جَفا
مَنده عِشقیمدَن سِئوینجیمدَن بَلالَار گؤرمیشَم
اِئیلَسه هَرپیس نه پیسلیک اؤز موکافاتین گؤرَر
یاخشِیا عؤمریمده هَر یِئرده جَزالَار گؤرمیشَم
دؤز«ظفر» هَردَرده گَلسه عِشقیدَن اِئتمه گِلِئی
وارلیقین وِئرمیش بوعِشقه موبتَلالَار گؤرمیشَم
ائوین چیراغی آی آنا
لالا یاناغی آی آنا
عشقین بولاغی آی آنا
اوره کدن سئویرم سنی
عومروموزده دور داناسان
سن یارانیبسان یاناسان
شام کیمی چون سن آناسان
اوره کدن سئویرم سنی
گوی اوزونده گونئش آیسان
قیشدا منه ایستی یایسان
من بالیغام سن بیر چایسان
اورکدن سئویرم سنی
بهنام اوغلون قاراداغلی
ائتمز آنا سینه ن داغلی
روحوم جانیم سنه باغلی
اورکدن سئویرم سنی
☆ بهنام قاراداغلی (ایشیق) ☆
عشقین بولاغین قویما بولانسین کی درولماز
عشقین یولونی دوز گیده هر کیمسه یورولماز
هر کیمسه گئلیب عاشق لایق اولا بیلمز
بو مکتب عشق ایچره یالان اولمییب اولماز
گر آغلاماسا قاره بولوت غنچا گول آچماز
گر گولمسه گول درد و غمه چاره تاپیلماز
گلشنده گولون قیمتی گولدور گوله بیلسئه
نامرد الی سیندیرماسا بو شاخه نی سولماز
بیر عومر چکیب نازینی بولبول آچا بیر گون
درد اهلی اولان غنچه لنن شاخه نی یولماز
عشق اولماسا عالمده گوزلیک گوزه گلمز
بو چارداغی قویما یخا یئل بیرده قورولماز
(( آتا ))
آ دوسلار غَمْلَرین داغی دیر آتا
مَحبّتین بارلی باغی دیر آتا
***
آتادیر آنایا تَسَلّی وِرَن
دَردلی خَسته لره ساغی دیر آتا
***
اُوْلاد داردا قالسا آتا دؤزَنْمَز
هَر قارا گونلَرین آغی دیر آتا
***
آتا آئیله نین مُوحکم دایاغی
بارلی بُوستانلارین تاغی دیر آتا
***
بالانین دَردینی بیلَر آتالار
کُووْرَک اؤرَکلَرین یاغی دیر آتا
***
آتا کؤچدون بو «آمانسیز» دونیادان
سَنسیز عومْرون آجی چاغی دیر آتا
***
☆ آنا دیلیم اؤلن دئیل ☆
آیلار اؤتور ایل دولانیر
گئدن گئری دؤنن دئیل
لاچین کؤنلوم قاناد چالیر
گؤیلریندن ائنن دئیل
بیر داغام کی گؤیده باشیم
چوخ قدیمدیر منیم یاشیم
آلوولانسا بیرجه داشیم
میلیون ایلده سؤنن دئیل
آذربایجان منیم ائلیم
آذربایجان منیم دیلیم
دوغرانسا دا دیلیم دیلیم
اؤزگه دیله چؤنن دئیل
هم آرازام هم ده کورم
آخیب خزره تؤکوللم
دیلیم اؤلسه من ده اؤلوم
آنا دیلیم اؤلن دئیل
آنا دیلیم
🌺🌺🌺🌺🌺🌺🌺🌺🌺🌺
سویوق قیشا دؤندو یازیم
دوستاق اولدو دیلیم یازیم
دوشمن ووردو سیندی سازیم
غمله دولدوم آنا دیلیم
🌺🌺🌺🌺🌺🌺🌺🌺🌺🌺
باشقالاری یازدی سیلدی
بیلمه دیین باخدی بیلدی
دئدیلر کی بیزیم دیلدی
حسرت قالدیم آنا دیلیم
🌺🌺🌺🌺🌺🌺🌺🌺🌺🌺
دئدیم منیم دیلیم هانی
یاشادیغیم ایلیم هانی
آنام آتام ائلیم هانی
آغلار اولدوم آنا دیلیم
🌺🌺🌺🌺🌺🌺🌺🌺🌺🌺
"ایشیق" سؤزو کیم دویاندی
آخان بختیم آه دایاندی
فراقینده روحوم یاندی
گول تک سؤلدوم آنا دیلیم
ایشیق قاراداغلی
((ای گول))
*****
ای گول نه روادور کی سنین عومرون آز اولسون
باغ باغچالارین گؤهری بیردن بئله سؤلسون
*****
سنسیز چمنین زینتی اولماز بیلیرم من
گولسوز چمنی نغمه لی بولبول نجه بولْسون
*****
عطرون إلییر مست و خورامان بیزی هرگون
انصاف دان اوزاقدیر سنی باغدا بیری یولسون
*****
بولبول دولانار باغچالاری گوللره خاطیر
عاشيق دی سنه چون کی بیلیر باغچادا بول سون
*****
بولبول سنه عاشیقدی بونو یاخشی بیلیرسن
گل قویما بو عاشيق سنه خاطر بئله اؤلسون
*****
گول اولماسا هچ واقت چمنین ارزیشی اولماز
قویما کی چمن ارزیشی سنلن یاری بؤلسون
*****
قوی پوسته دوداغلار آچیلا باغلار ایچینده
تا عشقینه عاشیقلر، ائییندن باغا دولسون
*****
سن جان وئریسن داغلارا چون جانلی بئزک سن
گوج وئر بو قوجا داغلارا قویما کی یؤرولسون
*****
ای گول بو«آمانسیز» داغینین زیوری سن سن
آچ غونچه لرین سئر بو داغا تا اوزو گولسون
*****
🌷🌺🌷🌺🌷🌺
چاره سیز خسته لرین ، دردینه درمان آنادی
دفتر عشق و وفا ، مشقینه پایان آنادی
سینه سی دشت بلا ، آتش بحراندا یانیر
سارالان یاز گولی تک ، تشنه ی باران آنادی
هر بلا درده دوزر ، شرط محبتده اوزی
گر مصیبت داغ اولا ، صبریده طوفان آنادی
عشق پروانه سی تک ، شمع ائولاده گئنه
یاندیران بال و پرین ، عاشق گریان آنادی
آی دئسون اوخشاری وار ، اولدوزا چوخ بنزری وار
گونی خجلتده قویان ، دُرّ بدخشان آنادی
اوکی هر صبحه کیمی ، یاتمادی غمنن گئجه لر
سنه لای لای اوخویان ، بلبل نالان آنادی
شاهلیقین شیوه سی وار ، مَسندی مین لشگری وار
تاج و تختسیز جاهانا ، سرور و سلطان آنادی
منی حیران ائلییه ن ، دنیادا بیر مسئله دی
نییه ائولاد اوتینا ، دنیاسی تالان آنادی
آناوین قدرینی بیل ، زاهد اگر شاه اولاسان
چون امیبسن سوتینی ، چشمه ی احسان آنادی
🌷🌺🌷🌺🌷🌺
💫💫💫
«سوروش»
ائل سوزون بيلگيلن تا اولان دولو
يوباندير باخيشى گؤزله ساغ سولو
دونيا دا تاپماسان ايتيرسن يولو
ياشاييش رسمينى قوجا دان سوروش
💫💫💫
تيكمه گوز قاباغا باخ هر دن دالى
آيى لار اوغورلار آرى دان بالى
كيمسه يه خوش گئلر اوزگه نين حالى
آلچاق لار ليذذتين اوجا دان سوروش
💫💫💫
ظولوم ده ياشاماق گورن نئجه دير
'حسرت'لر ايچينده ظولوم وئجه دير؟
گونش لر گيزلنيب تامام گئجه دير
ايشيغليق حسرتين باجا دان سوروش
بهزادبيات فرد
( #حسرت_زنگانلى )
💫💫💫