افتخاريم بودو تورکم ، ديليم آذر ديليدي
ديوسوز هرنه ديون ، تُركه بو ديل سئوگيليدي
دَده قورقوددي دَدَم ، سازي باسوب سينه سينه
سازينون پرده لَري ، خلقه ، ايپَك تك تِليدی
قهرمان بابكيميز واردي آدي ذروَه ده دي
ديَه بيلَّم كه اوزي تك ليگينه ، مين ائليدي
سارا عصمتلي گلين لَر بِجَريب آذر ائلی
عِصمَتين حِفظ اِئلماقليقدا ، پَناهي سِئليدي
خان چوبانلار واريميزدي ، نبي لر ، دُمْرُل لَر
هَر بيري تُرك ائلينون زحمتينون حاصليدي
شهريار تركيدي، سعي ايلَمه سن فارس ائده سی
او اَدَب گُلشَنينون ايچره سولونماز گُليدي
تُرك دانماز ديليني ، بَلكه اونا فَخر ائليَر
ديليني دانسا بيري ، سَن ديري سانما ، اُليدي
قوچ كور اوغلي، دَلي ايوازي تانور تُرك اوشاقي
گر چه مسكن اولارا ، داغ آرا چَنلي بئليدي
ساتقين اولما ، ديلووي ساتما آماندور يليگ اول
فارسي اورگَتمَك اوشاقه بو ديلين قاتليدي
فارسيني اورگَشَجَكدور اوشاقون جامِعَه دَن
گوزَل ايرانيميزين ، فارسي كه رَسمي ديليدي
اِئوده باري اوشاقونلان ، گوزَليم تُركجَه قونوش
دئمَه سين بيرگون او،تُركي ديلي،چوخ مُشگليدي
دَرد دانيشديردي گنه ((جعفري))ني نيلَه مَه لي
بوني ياخشي بيلورَم ، سَن ديَه جَكسَن دَليدی
جعفری زاویه
