عزیزیم، بادا گئتدی
یئل ووردو بادا گئتدی
دوشمن بیر ایش ایشله دی
گنج عؤمروم بادا گئتدی
گؤیلر بولودلو قالدی
قوشلار اومودلی قالدی
آچاری یار بوینوندا
گؤنلوم کیلیدلی قالدی
آتیمیزی قوشالیم
داغی-داشی آشالیم
سن یاغیش اول، من بولوت
یاغارکن قووشالیم
فلكين ايشي دوشسون
آغزيندان ديشي دوشسون
اونوندا منيم كيمي
نامرده ايشي دوشسون
فلكين قهري منه
گلميري رحمي منه
دولدورور غم باده سين
ايچيردير زهري منه
فلكين داد اليندن
اولماديم شاد اليندن
ياپيشايديم ياخاندان
چكييديم داد اليندن
سويا گئده‌ن ايگيدي،
ساچي مخمر تكيدي.
آللاه مني سو ائيله.
سو گؤزه‌للر يوكودو.
سو آخير سامانليقدان،
يول كئچير قارانليقدان.
چاليش ياخشيليق ائله،
نه چيخار يامانليقدان؟
سو تك چاغلارام سنسيز،
قارا باغلارام سنسيز.
گئجه‌لر صبحه كيمي،
درددن آغلارام سنسيز.
سو گلر آرخا، هاراي!
تؤكولمز چارخا، هاراي!
ايگيد غربته دوشسه،
چاغيرار آرخا، هاراي!
سو آخار، يئر ياش قالار،
داش زينداندا داش قالار.
اوغلو گئده‌ن آنانين،
گؤزلرينده ياش قالار
سويون بندينه قوربان،
يارين فندينه قوربان.
يار آتيني يهرلر،
سينه بندينه قوربان.
سو گلير گيله ـ گيله
بولبوللر گلير ديله.
ياريمي باغدا گؤردوم،
باتيبدير قيزيل گوله.
سو گلر آخار، دويماز،
داغ ـ داشي ياخار، دويماز.
گؤزلريم يار گؤزونه،
اؤلونجه باخار، دويماز
ائله‌ديمي سو يازدا،
آخار گئده‌ر سو يازدا.
من ياري گؤرمه‌ميشم،
كئچن يازدا، بو يازدا.
سودا ياندي…
اود ياندي، سودا ياندي.
درديمي سويا دئديم،
اود توتدو، اودا ياندي.
دوشن يئري…
آتلانيب، دوشن يئري.
گؤز ياشيم اودا دؤنوب،
يانديرار دوشن يئري.
آلتيمدا كيليم ياندي،
اود دوشدو، كيليم ياندي.
بالا، بالا دئمكده‌ن،
آغيزيمدا ديليم ياندي.
اوزه‌رليك دانا ـ دانا،
اوجاغدان گؤتورسانا.
بالا ـ بالا دئمكده‌ن،
نظري بد اولانين،
گؤزلري اوددا يانا.
كؤينه‌يين گولو يانسين،
اود توتسون، گولو يانسين.
سني منده‌ن ائده‌نين،
آغزيندا ديلي يانسين.
اوجاغين اودو كئچدي،
يئل ووردو، اودو كئچدي.
نه باخيرسان آي اوغلان،
سئوگيلين بودو كئچدي.
